رواية خطيب مؤقت الفصل الثالث 3 والاخير بقلم عمرو ليث
• أنا فين!
: أنت في المستشفىٰ
• وأنتي مين وجيت هنا إزاي؟
: كنت بدور عليك وعرفت أنك في البيت بتاعكم، أنا ملك صحبتة رحمة مراتك
• وبتدوري عليا ليه؟
: عشان أقولك أن رحمة مراتك متبقاش مراتك
• أي!
فقت بعد ما لقيت نفسي في المستشفىٰ واللي جابتني صحبة رحمة إللي بتقول أنها مش مراتي، مكملتش كلامها ولقيت في دكتور دخل وفتح الباب بكل عنف ومعاه إتنين عاملين زي الهضبة واقفين وراه ..
• أستاذ يوسف حمدلله على السلامة
: الله يسلمك
• إحنا محتاجينك تيجي معانا
: معاكم فين!
• هتعرف دلوقتي
حاولت اتعدل بالعافية حاسس أن جسمي مكسر من كتر التعب، والاتنين إللي كانوا واقفين معاه جم عشان يساعدوني، فضلت أبص علىٰ ملك لحد ما غابت عن عيني، وحاسس أن كان في حاجة عايزة تقولها بس معرفتش، ولقيت حد بيضربني في رقبتي، بس دي مش ضربة دي حقنة .
الأيام مكانتش بتعدي وأنا كنت عارفة أن في شخص بيتم إستنزافه وبيتضحك عليه، ضميري مكنش ساكت كنت حاسة أني بتّاكل من جوايا من كتر السكوت، إتغلبت علىٰ نفسي وكلمت رحمة بحجة اسألها علىٰ محمد وقالتلي أنه مش موجود، واللي أعرفه عنه أنه ملوش في الخروجات كتير، فقولت أشوفه في البيت بتاعهم، ولما وصلت لقيت الباب مفتوح، دخلت جوا لقيت التراب في كل حتة في المكان، لحد ما سمعت صوت حاجة بتتخبط، دخلت أشوفها اي هي ولقيته محمد إللي واقع علىٰ الأرض، كلمت الاسعاف واخدوه وفضلت معاه لحد ما فاق، ولسوء الحظ أني ملحقتش أقوله حاجة قبل ما ياخدوه علىٰ مستشفىٰ الأمراض العقلية .
• ممكن تمضي علىٰ الورق ده؟
: ده ورق أي!
• ده ورق أنك المسؤلة عن إبلاغ إدارة المستشفى بدخول أبن حضرتك عشان يتحجز
: بس كده؟
• ايوه عشان نخلي مسؤليتنا لو حصل أي شيء
: طب والورق هيخلص أمته؟
• بعد ما يتعمله تقرير طبي مفصل عن حالته
: يعني بناء على حالته هيطلع الورق؟
• ايوة بس ده إجراء روتيني متقلقيش كل حاجة هتخلص زي ما اتفقنا
: ماشي
مضيت علىٰ ورق دخول محمد المستشفى عشان تطلع الشهادة وتبقى كل أملاكه في ايدي، هيبقى بالنسبة للقانون واحد مجنون وبيتعالج ومش في وعقله، فـ طبيعي أكون أنا الوصية علىٰ كل حاجة ..
• ممكن يا عمتو أبص عليه قبل ما نمشي!
: ليه وبعدين هو لسه تحت تأثير المخدر
• هبص عليه من بعيد بس
: روحي
أول مرة أحس برجفة في جسمي وايدي، معرفش أي إللي وصلنا للمرحلة دي وخلانا كلنا عايزين ننهش في جسمك، يمكن متعودتش أحس بمشاعر عشان متربية في مكان مبيقدمش أي مشاعر، كل التعامل بجمود، كنت واقفة قدامه ومتلغبطة، مترددة، طلعت الورق من الشنطة والبصّامة عشان يبصم علىٰ ورق تنازل عن كل أملاكه ليا، فكرة قالي عليها محامي أن البصمة زي الأمضة بالظبط، عملت إللي قالي عليه وجهزت الورق، ولسه هحط الحبر علىٰ إيده دخل الدكتور، اتخضيت وحطيت الورق بسرعة في الشنطة ..
• حضرتك ممنوع أي زيارات
: عارفة أنا كنت ببص عليه وهمشي
• تمام حضرتك
مشيت وأنا قلبي مخضوض من الخوف مش عارفة أي إللي بهببه ده، لقيت مرات عمي مستنياني واخدنا بعضنا ومشينا .
• حضرتك أنا ملحقتوش
: يعني أي ملحقتوش
• أول ما وصلت لقيت عربية إسعاف قدام البيت، سألت عليه قالولي أن الاسعاف أخدته
: ماشي ماشي هات الورق
الغبي قولتله أنجز عشان يلحقه قبل ما أمه تبعت للمستشفى عشان ياخدوه، فضلت محتارة حاسة أن كل حاجة بتضيع مني، أنا مستحيل اخد شوية ملاليم من واحدة هتاخد ملايين، فضلت أفكر هعمل أي ولا أروح فين عشان الحق نفسي قبل ما كل حاجة تضيع كده .
فوقت فجأة علىٰ نور جامد ضرب في عيني، وكأنه كشاف كبير قصادي، حاولت أفتح عيني بالعافية، مش قادر احرك أيدي كأني اتشليت، ورجلي مش بتتحرك هي كمان، أخدت كام دقيقة لحد ما قدرت أفتح عيني كويس وأشوف المكان إللي أنا فيه، لقيت نفسي قاعد علىٰ كرسي وايدي ورجلي مربوطين، وفي واحد قاعد قدامي بس بعيد شوية، أول ما فتحت عيني لقيته قرب مني ..
• حمدلله علىٰ السلامة
: أنتو مين!
• إحنا هنا في مستشفى الأمراض النفسية والعصبية والعقلية والمجانين
: عايزين أي!
• ولا حاجة إحنا مش عايزين حاجة
لقيت حد بيقرب من راسي وبيحط جهاز علىٰ راسي، عرفت أنه جهاز كهربى، الرؤية وضحت، فهمت كل حاجة، عرفت أي إللي بيحصل، بداية من الدبلة إللي كانت في ايدي اليمين مرورًا بشهادة الميلاد وورق التبني وكلام ملك لحد قعدتي على الكرسي ده، ده مش حلم دي لعبة!
• أخدت كام؟
لقيت الدكتور بصلي وأتخض، وخلى إللي كان واقف ورايا يخرج ..
: قولت أي؟
• أخدت كام عشان يخلوك تثبت أني مجنون
لقيته اتوتر ورفع النضارة لفوق وبلع ريقة، فضل يقلب في الورق إللي قدامه وأنا براقبه، براقب ردود فعله وتصرفاته، ده مش دكتور أصلًا!
: أنا بنفذ أوامر زي ما بيتطلب مني
• ومين إللي طلب منك؟
: مينفعش أقولك
• هتاخد كام؟
بصلي وحط عينه في عيني إللي مش قادر يرفعها ..
: عشرين الف
• دكتور محترم زيك هيخون القسم بتاعه عشان عشرين الف؟
وشه بدأ يقلب ألوان وتوتر جامد، مشي لحد المكتب ووقف دقيقتين ورجعلي تاني ..
• هديك قدهم خمس مرات
: أي!
• زي ما سمعت وبدل ما تخون القسم وتخون الأمانة قدام ربنا أنت هتساعدني والفلوس إللي هتاخدها مقابل مساعدتك ليا
: تمام موافق
• أنت مهنتك أي غير دور الدكتور إللي لايق عليك ده؟
أتخض وبصلي جامد، خلاص اللعبة بقيت مكشوفة وظاهرة، دي مش تصرفات دكتور ولا ده كلام دكتور أصلًا، بس المرة دي رد عليا وهو مش متردد ..
• محامي بس سبت المحاماة واشتغلت مع دكتور ومدير المستشفى هنا
: إللي هو قالك تعمل كده معايا
• أيوة
: طب كويس كده معقولة
• أنت عايز مني أي؟
: بما أنك طلعت محامي فأنت مش هتساعدني أخرج بس
• أمال هعمل أي تاني؟
: هقولك .
أستغليت خوفه ونقطة الضعف إللي كانت ورقة مكشوفة قدامي، واستغليتها كويس جدًا عشان افهم السيناريو الفكسان إللي بيحصل، كده نلعب علىٰ المكشوف، اللعبة إللي كنت أنا تايه فيها ومش عارفها، دلوقتي فهمت، ونلعب كلنا واللي هيكسب هيكمل .
مكنتش عارفة هعمل أي، مش قادرة أقعد علىٰ حيلي بجد حاسة بتأنيب ضمير غير طبيعي، جوايا شخصيتين بيصارعوا بعض، واحدة بتقول ملناش دعوة، وواحدة عايزاني أفرك وادبدب لحد ما اساعده، مقدرتش اقاوم، كان لازم أختار قرار عشان دماغي تهدأ، وعشان انا كمان أهدى واعرف المفروض هعمل أي في إللي جاي، ماهو أنا أخدت القرار، واتحركت عشان أروح اساعده .
دماغي انفجرت من كتر السيناريوهات إللي جتلي، مش فاهم أي حاجة وليه كل إللي بيحصل ده، معقول واحدة تعمل كده، طب ما كانت تواجهني بالحقيقة، ليه تشقلب حياتي وتطلعني مجنون وتخليني مسلوب الإرادة، ومراتي إللي مطلعتش مراتي وعاملة دور الزوجة الحنونة إللي طلعت بتساعدها، حسيت أني في دوامة، في دوامة كبيرة ومش عارف هخرج منها أمته ولا إزاي، لقيت الباب بيتفتح وبيقولولي أن في حد جايلي هنا زيارة، مانعين أني أخرج من الغرفة إللي أنا فيها، يعني إللي جاي هيدخلي هنا، كان شخص متوقعتش أنه يجيلي هنا .
• أستاذ محمد
: ملك!
• أي إللي جابك هنا
: كان في سؤال مهم جدًا كنت عايزة اسألهولك عشان كده جيتلك هنا، أنت متعرفش أنا عملت أي عشان يوافقوا أدخل
• سؤال مهم لدرجة دي؟
: جدًا
• أي؟
: أنت إزاي أسمك محمد وفي شهادة الميلاد يوسف توفيق الشوربجي
• بينادوني محمد من وأنا وصغير علىٰ اسم عمي عشان طلعت شبهه، ويوسف في شهادة الميلاد والبطاقة
: طب وبالنسبة لـ يوسف خضر الكواملي؟
• أنتي وصلتي للورق ده إزاي؟
: ده الورق إللي لقيته جمبك أنت وواقع وعرفت أنه السبب في حالتك لما تعبت، فأخدته عشان اشيله معايا
• وورق التبني؟
: معايا
• أنتي عايزة أي مني ولا أنتي كمان معاهم؟
: مع مين!
• مع أمي إللي طلعت مش أمي وعايزة تثبت أني مجنون عشان تاخد كل حاجة، ولا زي مراتي إللي طلعت مش مراتي وبتساعد أمي!
: بس رحمة مش بتساعد أمك
• أمال بتساعد مين!
: بتساعد نفسها عشان تاخد منك إللي أمك عايزة تاخده
• أنتي عرفتي منين؟
: قالتلي أنها عايزة تبعتلك اوردر بأسمك ولما تستلمه وتمضي علىٰ ورقة الاستلام إللي هي عقد تنازل عن كل أملاكك
• أنتي بتقولي أي؟
: وفي حاجة كمان
• أي؟
: دي نتيجة التحاليل إللي اتعملتلك في المستشفى لما اخدوك هناك، وطلعت بتاخد مواد مخدرة بتاكل الجدار العقلي والعصبي بتاعك عشان عقلك يسيح واحدة واحدة
سمعت الكلام إللي بتقوله واتشنجت وكأن في ماية ساقعة نزلت عليا في شتا بارد، أي الفيلم إللي أنا فيه ده، ومين إللي بيعمل كده تاني!
وقفت ودماغي وقفت معايا لما افتكرت نور وهي بتقولي علىٰ المخدر إللي حطيناه في العصير بتاع رحمة، وأنا إللي شربت العصير إللي فيه المخدر، يعني أنا مكنتش بحلم ولا كنت مش واعي، يعني كل ده حقيقة وحصل!
ونور إللي هي أصلًا دكتورة وأكيد بتفهم في المواد المخدرة، يعني هي إللي كانت بتحطلي الحاجات دي عشان أشرب!
• وأنتي عايزة أي يا ملك
: أنا بساعدك عشان تخرج من هنا
• تساعديني زي ما هما مفهميني أنهم أهلي؟
: يوسف أنا مليش مصلحة من وراك عشان اخدها، معنديش سبب يخليني أعرض نفسي للخطر عشان ادخل مستشفى مجانين بشخصية مزيفة عشان أشوفك واساعدك، مليش مصلحة، كل الحكاية أني عندي ضمير ومستحملتش أقعد وأنام وفي حد بيتعذب وبيتلعب عليه لعبة قذرة زي دي وأفضل اتفرج، الفرق إللي بيني وبينهم أني عندي ضمير، أنا مش عايزة حاجة ولا مستنية حاجة، بعمل كده عشان أرضي ربنا ومضميري بس، حاجات يمكن مشفتهاش في العيلة بتاعتك عشان كده طبيعي شايف الناس كلها معدومة الضمير .
كلامها فوقني شوية، خلىٰ جسمي يرتعش من كتر ماهي بتلومني علىٰ حاجة مليش ذنب فيها، بتلومني علىٰ مكان وبيئة مخترتهمش من الأول، مليش ذنب في كل ده بتحاسب علىٰ حاجة مش بتاعتي .
• أنا عايز منك خدمة واحدة بس
: أي هي؟
• توصلي لأبويا خضر الكواملي وتعرفي عايش ولا ميت ولا ساكن فين
: بسيطة بس أنا عايزاك تخرج
• هخرج بس مش دلوقتي
: ليه!
• في حاجة لازم اخلصها هنا الأول
: حاجة أي إللي هتخلصها في مستشفى المجانين يا أستاذ يوسف
• هتفهمي في الآخر
: ماشي خلي بالك من نفسك بس
• حاضر .. بس مقولتليش دخلتي هنا إزاي؟
لقيتها وقفت ولبست الشنطة وبصتلي ..
• عشان ورق اللعبة كل قدامي وعرفت استغل جولة منها
: مش فاهم؟
• أنا كنت عارفة أن أمك أو إللي عاملة أمك كانت متفقة مع مستشفى عشان تتحجز فيها وتثبت أنك مجنون، عرفت كل ده من رحمة، ولما جيت هنا دخلت للمدير وقولتله أني صحفية من جريدة وجاية أعمل مقابلة مع محمد توفيق الشوربجي بأمر من والدته عشان ننزل الخبر، وهو طبعا عشان متفق معاها فـ أكيد هيثق في كلامي، رغم أن مفيش صحفي دخل مستشفى أمراض نفسية قبل كده
: وهو صدق من غير ما توريه الكارنية؟
لقيتها فتحت الشنطة وطلعت الكارنية بتاع النقابة ..
• عيب تشكك في قدرات واحدة زيي انا مش صحفية والكارنية ده لسه معمول من ساعة
: أي!
• أستاذ يوسف إللي بيعمل حاجة غلط لازم يعملها بطريقة صح ومظبوطة
: يعمل الغلط بطريقة صح؟
• بالظبط .. إقامة سعيدة
ردت عليا وسابتني وخرجت وأنا مبتسم لأول مرة من ساعة ما دخلت اللعبة دي، حاسس أني بدأت أستعيد دماغي وافكاري من تاني، نستمتع بقا باللي هيحصل .
• يعني أي! إزاي مفيش الكلام ده
: حضرتك الورق موثقة في الشهر العقاري من شهرين
• أنت إزاي محامي، هو لسه داخل المستشفى من أسبوع أصلًا هيبيع كل حاجة من شهرين إزاي
: زي ما بقول لحضرتك كده
• متجننيش إزاي ده حصل؟
: أكيد يافندم تم البيع بتاريخ قديم بموافقة الطرفين
• هو عادي؟
: قانونًا عادي
• طب شكرًا اتفضل أنت .
كنت قاعدة مع مرات عمي وهي بتكلم المحامي، إزاي محمد طلع بايع كل حاجة من شهرين، كنا مستغربين مش فاهمين أي حاجة، لقيت مرات عمي بتبصلي ..
• معقول تكون رحمة عملت كده؟
: معرفش وبعدين هتعمل كده إزاي وهي بتساعدنا لحد دلوقتي
• مأنا هتجنن
: رحمة لو عملت كده كانت مشيت من زمان وخلعت
• أمال ده حصل إزاي، معقول يكون باع كل حاجة فعلا ولا في حد كشف لعبتنا ولعب عليه؟
: ممكن
فضلت مرات عمي تخبط في كل حاجة قدامها، مش مصدقة أن كل حاجة ضاعت بعد كل إللي عملاناه، سبتها ومشيت وأنا خايفة ومش عارفة أي إللي هيحصل .
• عملت أي؟
: حصل
• شكرًا يا دكتور جميلك ده فوق رأسي والله
: حاولت أصلح أي حاجة من إللي عملته
• كتر خيرك
: في حاجة كمان كنت محتفظ بيها ربما أطلع زي العسكري اللي في لعبة الشطرنج ويتضحى بيه
• حاجة أي؟
: محتفظ بتسجيلات لدكتور وهو بيتفق معايا عشان احطك تحت الجهاز لحد ما دماغك تتعب جامد وحكالي كل قصتك مع والدتك ولحسن الحظ أني كنت بسجل كل ده، عشان لما يتغدر بيا أطلع التسجيل
• تبيع التسجيل؟
: مش هبيعه
• ليه؟
: عشان هقدمه لنيابة
• طب أصبر مش دلوقتي
: ليه؟
• في حاجة كمان عايزك تساعدني فيها
عرفت منه أن أمي جاية زيارة ليا النهاردة بليل، واتفقت معاه علىٰ حاجة يعملها عشان نخلص من كل ده .
خرج الدكتور ولقيت ملك داخله بعده علىٰ طول وهي مبتسمة وبتجري عليا ..
• أنتي داخلة طالعة هي مستشفة ابوكي؟
: قولتلك متشككش في قدراتي
• حاضر طمنيني عملتي أي؟
لقيتها بتطلع التليفون بتاعها وبتسمعني حاجة، كان صوت راجل بتتكلم معاه، وأول ما سمعت كلمة إبني يوسف دموعي نزلت واخدت التليفون منها، جسمي بيرتعش جامد وكأن روحي بتتسحب، فضلت أعيط وأنا وبسمع أبويا هو وبيحكي لـ ملك إللي حصل وازاي توفيق الشوربجي عرض عليه مبلغ عشان يتباني بعد ما شافني في المستشفى مع أبويا، وابويا كان راجل علىٰ قد حاله والفقر باين علىٰ هدومه، قدر يمسكه من نقطة ضعفه ويشتريني، وخلاني علىٰ إسمه، قالتله ملك أني عايش وعرفت، سمعت صوت رجفته وهو بيعيط ومستنيني، سمعت صوت ضربات قلبه إللي بتنادي بأسمي، خلص التسجيل واخدت ملك التليفون ..
• هترجعله إمتى قلبه واجعه عليك، لحد النهارده بيلوم نفسه
: كل حاجة هتخلص النهاردة بليل
• هتعمل أي؟
: هقولك بس عايزك تستنيني الساعة 10 بليل قدام المستشفىٰ
• حاضر
مشيت ملك وفضلت قاعد علىٰ النار مستني اللحظة إللي هتيجي فيها أمي عشان اشوفها، جت الساعة 8 ولقيت الباب بيتفتح، ودخلت هي ورحمة ونور، الشلة كلها مع بعض، ضلوع اللعبة بقيوا كلهم علىٰ تربيزة واحدة، قعدوا قدامي وعنيهم علىٰ أمي إللي بتبصلي بنظرة مليانة شرار، وأنا ببادلها بإبتسامة باردة .
• جالك الورق؟
: بعت كل حاجة لمين؟
• مبعتش حاجة لحد
: وديت أملاك جوزي وفلوسه فين يا يوسف
• والله ما بعت حاجة لحد، أنا بعتهم لنفسي، بعت كل حاجة لـ يوسف خضر الكواملي
لقيتهم بصولي واتخضوا بعد ما سمعوا الإسم ..
• اتخضيتوا ليه؟ اتخضيتي ليه يا رحمة يا مراتي؟ لما واحدة غبية زيك بتتجوز الراجل يومين تلاتة وتاخد أجرها باليلة تبقى غبية لما تيجي تضحك عليا، متبقيش تنسي الدبلة بعد كده لما تعملي دور الزوجة تاني مع حد، ابقي خليه يلبسها في الشمال مش اليمين .
لقيت وشها قلب ألوان واتخضت، بصيت علىٰ نور هي كمان إللي حاطة وشها في الأرض ..
• ودكتورة العيلة المحترمة إللي كنت فاكرها بنت عمي وبتساعدني، بتداري علىٰ خطيبتي إللي شايفها بعيني أنا وهي وهي داخلة الفندق مع جوزها إللي متجوزها عرفي يومين، ولكن بتكدبني لما قولتلها، وأنا طبيعي مش هعرف اتأكد لأني مغيب، بنت عمي بتحطلي مخدر فيه مواد بتسيح الدماغ، اي الجبروت ده، ليه بتعملوا كده بجد عملتلكم أي لكل ده، عشان الفلوس يا أمي يالي مربياني وبتاخديني في حضنك، بس هقول أي مفيش كلام يوصف القذارة دي، مفيش أزبل من أنكم تضحكوا علىٰ راجل كبير وتشتروا ابنه وتمسكوه من نقطة ضعفه إللي هي الفقر وتخلوا الفلوس تزغلل في عينه ويوافق يبيع ابنه، مفيش بعد كده تاني بجد .
كنت بتكلم معاهم ولقيت الدكتور مدير المستشفى داخل علينا ..
• أهو الفاشل إللي مخلياه يكتبلك ورقة أني مجنون، دكتور بايع ضميره ومهنته والعهد والامانه مع ربنا، مكان ناقص يدخل فيه أبو لهب وتبقى جهنم كلها هنا
مفيش ثواني ودخلت رجالة الشرطة تقبض عليهم كلهم، دكتور بيزور ورق غير رسمي، أم بتتفق أنها تكهرب أبنها وتعذبه، واحدة شمال بتشتغل بالليلة، ودكتورة بتحط مواد مخدرة وتهمة شروع في قتل، خليت المحامي إللي عامل دكتور يوثق ورق بيع وتحويل فلوس من اسمي لـ اسم يوسف خضر الكواملي اللي هو أنا بردو بورق رسمي، عشان لما أمي تاخد الورق اللي بيثبت أني مجنون وتبيع كل حاجة تكتشف أن مفيش حاجة أصلًا، ونور إللي لقيوا المخدر عندها في البيت إللي كانت بتحطهولي، ورحمة إللي بيدوروا عليها أصلًا، وأنا يوسف خضر الكواملي غيرت هدومي بعد ما قلبت التربيزة عليهم كلهم بإستثناء المحامي إللي ساعدني، وقفلت لهم المستشفى بقرار وزاري، خرجت لقيت ملك مستنياني قدام البوابة بتاعت المستشفى ..
• عملت أي؟
: هحكيلك إحنا وفي الطريق
• علىٰ فين!
: هقولك
مشينا بالعربية رايحين المكان إللي جيت علىٰ وش الدنيا فيه، المكان إللي بنتمي لأهله وناسه، الشرقية، روحت عشان ارجع لأهلي وبيتي إللي عشت كل السنين دي بعيد عنهم وأنا معرفش أي حاجة، بعت كل حاجة كانت بأسمي ووزعت نصها علىٰ الملاجئ، والباقي عشان أهلي ويعيشوا العيشة إللي كانوا محرومين منها، هتسالني وأنت بتعمل أي دلوقتي؟
هقولك قاعد علىٰ الطبلية بفطر أحلى فطار في الدنيا، في وسط الزرع والشجر ..
• بس البيض ده مستواش كويس
: طب جربي الفول
• حلو أوي هات بصلة من قدامك
: متكتريش عشان متتعبيش
• بقولك أي اسكت أنا أول مرة افطر فطار زي ده سيبني انبسط
: طب بقولك أي يا ملك
• لما أخلص أكل الأول
: اسمعي يا طفسة
• سمعاك
: أي رايك لو نفطر كل يوم هنا؟
• وسط الزرع؟
: وتاكلي البصل الأخضر
• معقول هسكن هنا معاكم؟
: ونتجوز
• وهاكل البصل مع الفول
: هزرعلك فدانين
• موافقة هات البطاطس المحمرة دي بقا
طفسة بجد بس هعمل أي نصيبي ولقيته قدامي، جتلي في أصعب الظروف وفي أسوء حالاتي، وقررت أنها تكمل معايا للآخر، وسط أهلي وناسي والمكان إللي نشأت فيه
• ووسط الزرع والبط
: تعرفي انا كان نفسي أجيب بقرة وأزرع فدان برسيم وأرعاهم
• طب واي المانع؟
: لقيت البقرة ناقص الأرض
• هي فين البقرة
بصيتلها وضحكت، ولقيتها ضحكت علىٰ ضحكتي وكملنا فطارنا .
تمت .
لـ عمرو خالد لـيث
#الكاتب_ليث
تمت