سكريبت بوكية ورد (كامل) بقلم اميرة عادل
بعد ما خلصت شغل روحت البيت لقيت إخوتي منتظريني، عشان يقولوا كل سنة وأنتِ طيبة بمناسبة عيد ميلادك؟ تؤ عشان أفتح هدية خطيبي فريد إللي بعتها ليا من الدولة المسافر فيها.
فتحت البوكس كان فيه شوكولاتة وحاجات كتير، بس اللي صدمني بوكيه الورد.. هو مكنش بوكيه ورد، لأ، بوكيه جماجم!!
صورت البوكيه وبعتله على الواتس:
ــــ إيه القرف اللي جبته ده يا فريد؟!
بعد دقايق لقيته رد:
ــــ قرف إيه؟ إيش فهمك أنتِ في الورد والذوق!!
ــــ مسمي القرف ده ورد؟! طب تعال خد القرف ده من هنا بدل ما أُولع فيه.
ــــ اوعي يا أميرة تفكري تعملي كدا، حياتك هتتدمر واوعي تقولي عليه قرف تاني، أنتِ فاهمة؟!
ــــ ليه كل ده؟!
ــــ أميرة اسمعي كلامي وبس.
ــــ فريد أنت باين عليك اتجننت وأنا مش فاضية للهبل ده.
ــــ اعملي إللي عوزاه يا أميرة بس مترجعيش تندمي بعدين.
قفلت معاه.
مسكت بوكيه الورد ورميته في الزبالة وانتهيت من قصته...
بس تاني يوم لما رجعت من الشغل لقيته موجود على سريري!!
قربت من السرير ومن جوايا كنت خايفة، بس جمدت قلبي ومسكته بخوف شوية، ومن جوايا بقول إيه اللي جابه هنا وأنا رميته إمبارح!!
بالليل كلمت فريد بس مش حكيتله اللي حصل لسبب أنا نفسي مش عارفاه، يمكن عشان حاسة هيقولي "مش سمعتِ كلامه"، وبنفس الوقت يمكن أنا مش رميته أصلاً.
عدى يوم.. يومين... ثلاثة، ومفيش أي جديد أو حاجة غريبة..
بس في اليوم ده بالليل حصل اللي عمري ما أتخيله، ولو في أحلامي...
صحيت الساعة 12 بالليل على صوت صراخ...
جريت أشوف إيه فيه..وشوفته، كان كائن ما أعرفش ده حي ولا إيه، بس هو كان هيكل عظمي وعيونه حمراء بدرجة ترعب..
كان واقف في الصالة، وأختي الصغيرة مريم هي اللي شافته وكانت بتصرخ!!
وفجأة أختي مريم جسمها اترفع لفوق، وأنا من الخوف ما قدرتش أتكلم.
بس سمعت صوت بيكلمني:
ــــ هو حذَّرك ما تأذيش البوكيه، وأنتِ ما نفذتيش، وعيلتك هتكون ضحية أفعالك.
صرخت وأنا بقوله لما شوفت جسم أختي الصغيرة بـيـتـمـزق والد.م بينقُط على الأرض:
ــــ بس أنا مش عملت حاجة في البوكيه... أنا مش أذيتك.
بص لي بنظرة مرعبة وبعدها اختفى...
جريت على الموبايل أقول لفريد اللي حصل، بس اتفاجأت برَدَّة فعله الباردة:
ــــ أنا قولتلك يا أميرة بس أنتِ دماغك عنيدة وما سمعتيش الكلمة.
فضلت أبص دقيقة على كلامه وبعدها رديت:
ــــ يعني أنت عارف البوكيه ده فيه أذية ليا ومع ذلك بعته!!
ــــ يعني أنا غلطان أني بحافظ على علاقتنا وبعت أمي تكلم شيخ يعملنا الحجاب ده.
ــــ بالسحر يا فريد؟ ما تعرفش إن ده كُفر بربنا؟! على العموم أنا مش هسمح لشخص زيك يبقى في حياتي، بكرا الصبح هبعتلك حاجتك مع أخويا.
ــــ بس افتكري أنك الخسرانة.
ــــ بالعكس، كسبت نفسي وديني.
وانفصلنا، وبعدها أمي أخذتنا لشيخ يرقينا ونتخلص من البوكيه ده، بس الحمدلله عدت على خير.
وأفضل حاجة إني بعدت عن خطيبي؛ لأنه اللي فاكر السحر شيء عادي هيعمل أي حاجة تاني.
#بقلم_أميرةعادل
#بوكيه_ورد
#إسكريبت_تخيلي
#تمت