روايه ملك القطط كامله بقلم بيتر إفنجل
هذه الرواية متوفرة فقط على 👇
انا عثمان ابن فاطمة اللي من قرية "ميت خيبة " بتاع حكاية العروسة الملبوسه اياها لو فكرني ..
كانت نهايتها اني طلقتها يوم الدخلة ، والحمدلله ربنا كريم امي كمان حصلتني واطلقت في اليوم التالت ، ومن ساعتها وهي تقبل العمى ولا تقبلنيش و بتسوق عليا اهل القرية لاي حد ياخدني يشغلني معاه بره مصر او حتى بره القريه المهم اغور من وشها وخلاص ، بس انا كمان كنت سايق العوج ومش بقبل باي شغلانه فيها غربه وسفر ووجع قلب والبلد اللي اعرفها احسن من اللي ماعرفهاش ، لحد ماجه اليوم اللي خبط فيه على بابنا الواد همام صاحبي ، عشان جايبلي شغلانه ،
ويقوم الجحش ده يفتح الكلام قدام امي مش بيني وبينه ، ويقولي ..
- الشغلانه دي عال العال وهتخليك تعد فلوس زي الرز ياعثمان
= ايوه يعني منا مش فاهم اروح اعمل ايه في المتحف وبعدين انا مانفعش في المتاحف
- ليه ياعثمان ده انت هتقبض يجي ٨٠٠ جنيه في الشهر حتة واحده
= ايوه انا فاهم ان المبلغ ضخم ومغري بس هعمل ايه في المتحف برضو ماتنطق ؟
- هتبقى ظابط امن
= ظابط مرة واحده ؟ ده انا معايا أعداديه بالعافية
- ماهي مش بالشهادات
= امال بايه ياكبير البهايم! بالاخلاق الرفيعه؟
- لا بالجسم وقوة الشخصية
= جسم ايه يا أعمى أنت ، انت مش شايفني كويس ؟
- مالك ماشاء الله عليك جسمك حلو اهو
= جسمي حلو ازاي وانا شبه رغيف الفينو كده وبعدين فين قوة الشخصية دي ؟ انت بقيت تشوف حاجات غريبة ! انت بتشد كوله ياولا ؟
- ياسيدي انا موصي عليك وهيقبلوك انا خالي زهران هناك ماسك وزير الامن بتاعتهم كلهم ماتخفش
= خالك زهران وزير الامن هناك ؟ معقوله دي ؟
- ايوه والله ..
= بقى زهران الاوزعه اللي شبه مسمار الشيشه وزير امن ؟
- ماتتريقش على خالي ياعثمان ازعل منك والله
= خلاص متزعلش داهيه فيك وفيه
- لا انا كده قايم ماشي ومش قاعد معاك
= ياض اقعد خلاص ماتزعلش كده ، حقك على راسي ياسيدي
- طب ناوي على ايه تحب تبقى ظابط ولا لاء
"بتسمع امي كلامه ومره واحده بتهب فيا زي بابور الجاز اللي عايزله عمره وبتقولي :-
* ماتسمع يازفت كلامه وروح اشتغل انت هتفضل قاعد في ارابيزي كتير يانطع ، بقيت زي الكنبه اللي قاعد عليها روح شوف حالك ..
= الله ، مالك ياما منا بستفهم منه اذا كانت حلوه ولا وحشه هو انا قولت حاجه !
* حلوه ولا وحشه انا خلاص جبت اخري روح سافر شوف شغلك انا مش ناقصه هم
= ياما انا بحس انك لاقتيني قدام طابونة عيش بلدي ، انتي رمياني على طول كده ياوليه ؟
* ولولو عليك ساعتين وسكتوا ياقليل التربية ، انا بقى مصممه خلاص انك تسافر مصر وتبقى ظابط
- امك عندها حق ياعثمان لازم تشتغل ، وظابط دي يعني وظيفه قيمة وكلها فلوس
= ياسيدي وانت مال امك بعندها حق ولا لا ، ماهو انت سبب المصيبه اللي انا فيها دي
- طب قولي انت مش عجباك ليه فهمني ؟
= انا مش شايف نفسي ظابط ، وبعدين مابعرفش اضرب نار همسك سلاح ازاي؟
- هما هيعلموك كل حاجه ، وبعدها بتستلم مسدس ورشاش ودبابة وطياره وسفينه فضائية
= ايه كل ده ياجاموسة انت هو مافيش الا انا اللي هيحمي المتحف
- صدقني وطاوعني مش هتندم والله ،وفكر في ال٨٠٠ جنيه دي فرصه
= طب افرض لقيتهم عالم لبط وماخدتش ال٨٠٠ دول ،ايه قولك بقى ؟ اعمل ايه ساعتها ؟
- خالي زهران هو اللي هيقبضك ماتخفش
= اهو انا بقى مش خايف الا من زهران ده ،
بقى زهران اللى شبه كوز الدرة شغال وزير ؟
- انا قايم ياعثمان ومش هكلمك تاني
= ياخويا اترزع هتغور فين ، ماتزعلش خلاص ذلة لسان مقصوده الصراحه
- طب قولي هتشتغل وتسافر لخالي في مصر ولا مش هتشتغل
= حاضر ياهمام هروح اشتغل ظابط لما اشوف اخرتها معاكوا وعلى الله ماخدش ال٨٠٠ جنيه انا قولتلك اهو
- طب بالاذن انا بقى اما اطلع اتصل بخالي من عند عم منصور البقال واقوله انك مسافرله عشان يبقى عارف
= روح ياسيدي قوله داهيه فيك وفيه
- تاني ياعثمان
= بقولك قوله اللي نفسك فيه يابهيم
- طب بالاذن انا ..سلامو عليكو
بيخرج همام من عندي وسايبني بغلي من جوايا ، مصر ايه دي اللي هروحها ، زحمة وعالم ياما ومعرفش فيها حد بس خلاص الفاس وقعت ف الراس ولازم اتعتع واسافر لحسن امي قربت تعمل مني مصيدة للفيران ، استرها معايا يارب ماليش غيرك وامي شكلها هتطلع مش امي في الاخر ..
بيعدي يومين وبكون جهزت حالي ومسافر ومعايا عنوان المتحف ومن النجمة بكون ركبت القطر وفي طريقي لزهران الكلب ، ولفيت ياما واتهد حيلي لحد ماوصلت العنوان اللي معايا وطلبت من ظابط واقف هناك يخليني اقابل سيادة الوزير زهران ، ولاقيت الظباط بالعساكر بيضحكوا عليا وبيستهزئوا بيا وقام مديني كف خماسي قوته تعادل رفسة ميت جاموسة ، معقوله يابلد يبقى وسطتي وزير الامن واتضرب بالقلم ؟. قولت في نفسي بكره هلبس ظابط واستلم الاسلحة وماحدش هيشوف مني رحمة خلاص كده احلوت اوي يامصر ..
وبوصل اخيراً لزهران اللي شبه مشط رجلي ، ماشاء الله اوزعه ورفيع وشكله رمه وشغال وزير ازاي مش فاهم ؟
بيستقبلني وبيرحب بيا كتير الصراحة وبياخد مني البطاقه وشهادة ميلادى والـ٣ صور الشخصيه وسابني متلقح ساعتين واكتر ، بعدها جالي وقالي مبروك هتنزل الشغل من النهاردة بليل فانا قولتله
- ازاي شغل من بليل على طول كده ، انا محتاج اجازة
= اجازة ايه يابني انت جي تشتغل ولا جي تستجم
- يعني هو الشغل بيبقى طوالي كده ، ماعندكوش ظباط غيري هنا
= ظابط ايه ياعثمان ، انت جاي النهاردة عشان تبقى ظابط مره واحدة
- طب منا بقولك خليني ظابط بكره والنهارده يبقى راحة
= ظابط ازاي يابرطمان المفهوميه انت هتشتغل فرد امن عادي
- ايه فرد امن عادي دي
= زي اللي واقفين دول ودورك تخلي بالك ، وتمنع اي حد يقف في المكان ده او يقرب منه
- ايوه هبقى ظابط امتى يعني
= مش هتبقى خالص انت مبتفهمش
- طب والاسلحة ؟
= لا هتقف من غير اسلحة ، هو انت جي تحارب
- ولا حتى هتمسكوني عصاية مقشة ؟
= لا، ولا عصاية مقشة
- ااااه قول كده انتوا شكلكوا ضحكتوا عليا ومش هتدوني ال٨٠٠ جنيه
= لا هتاخد ٨٠٠ جنيه ماتخافش بس كل اول شهر
- طب الحمدلله اول الشهر بكره جيت في وقتي
= وانت فاكر نفسك هتقبض بكره ، انت ياعثمان مفكرتش تتعالج من الغباء ده
- انا غبي برضو ، طب ياسيدي الله يسمحك
= اسمعني ياعثمان لو فتحت مخك معايا
واشتغلت بجد ورفعت راسي هطلبلك زياده على مرتبك
- كام يعني ؟
= هطلبلك ٢٥ جنيه تقبضهم زيادة من الشهر الجاي
- احلف بالله كده
= والله ياعثمان
- انا خلاص من صوابع ايدك دي لضوافر ايدك دي قولي اعمل ايه وهعمله طوالي
= تفتح مخك بس ، سهله دي؟
- ماتخافش عليا انا هخليك تحلف انك مشوفتش ظابط بقدراتي
= يابني هتبقى فرد امن بس يخربيت غبائك
- طب وليه الغلط طيب ، ياسيدي الله يسامحك برضو
= يالا امشي وتعالى بليل
- اسافر يعني
= امشي ع السكن ياعثمان
- فين السكن ده ؟
= هبعت معاك حد يوصلك ويعرفك كل حاجه وبليل الساعه ٨ بالدقيقه الاقيك قدامي هنا
بروح السكن وبنعس شوية والساعه ٩ ونص بلاقي قفا سداسي الابعاد نازل عليا وزهران ورايا بيصحيني عشان اتاخرت بقوم جري البس اليوني فرن اللي بيقولوا عليه ده وبجري معاه عشان استلم مكاني في الامن ، وبتعرف هناك على عيل صعيدي اسمه عبد اللطيف وبنحكي والوقت بيجري بينا لحد الساعه ٣ الفجر ، فكنت بقوله ...
- قولي ياعبده ايه اغرب حاجه شوفتها هنا؟
= لا بلاش اقولك لحسن باين عليك قلبك رهيف وهتخاف
- لا انا قلبي عمره ماعرف طريق الخوف ، انا اصلا كانوا هيشغلوني هنا ظابط بسبب قوة شخصيتي
= بجد يعني قلبك حديد ولا بتقول كلام وخلاص
- عايز اقولك ياعبده انا ولله الحمد عندنا في البلد سيطي مسمع بين الناس عن حكاياتي اللي تشيب
= طب انت ايه اكتر حاجه بتخاف منها
- الفيران
= بتخاف من الفيران ؟!
- والقطط والكلاب واي حاجة بتمشي على الارض
= ضحكتني والله ياعثمان ، لا بجد بتخاف من ايه ؟
- لا كنت بخاف زمان بس دلوقتي مابخافش من اي حاجه في الدنيا
= حتى العفاريت ؟
- ولا عفاريت ولا جن ولا حتى الحكومة نفسها
= تعرف ان هنا في تمثال حي ؟
- حي ازاي ياعبده ؟
= يعني بيتحرك وممكن يقتل وجواه عفاريت
- هنا فين ؟
= جوه لو دخلت بكره ولا حاجه هتلاقي تمثال بعضلات وماسك سيف وتحت منه خمس قطط
- قطط ؟ ماسك سيف على شوية قطط
= لا ياعثمان ده عشان هو ملك القطط
- ملك القطط مره واحده وشكله بني ادم زينا
= اه وكل يوم بليل بيسرح القطط بتاعته وهما يختاروله الصيده اللي يقتلها
- كل يوم ؟
= كل يوم بليل
- .....
= مالك ياعثمان وشك اصفر كده ليه
- لا انا كويس اهو
= انت خوفت ؟
- لا مابخافش منا قولتلك ، بس هو يعني القطط دي شكلها ايه
= قطط عاديه زي اي قط بس مره تلاقي لونها اسود ومره اصفر ومره احمر انت وحظك
- احمر؟ مصر فيها قطط حمرا ؟
= اه ده لون الجن الخصوصي والاحمر ده اخطرهم
- وانت شوفت القطط دي قبل كده ؟
= لا لسه وربنا يستر حاكم اللي القطط دي تصطاده يقول على روحه يارحمان يارحيم
- يعني القطه اللي هناك دي ممكن تطلع منهم ؟
= ممكن اوي ، بص احنا نحاول نمشيها ولو ممشيتش يبقى منهم
- طب هشها كده ولا كده ياعبده احنا مش ناقصين
= شايف بتبصلنا ازاي ؟
- ايوه شايف بس اعمل روحك انك مش واخد بالك منها وهشها مره واحده
= ااااالحق ياعثمان دي اختفت
- طب ماتختفي ولا تغور في داهيه المهم انها مشيت
= عارف ده معناه ايه ؟ معناه انها منهم وبتقدر تختفي
- طب يالا حلو كده وخلينا نمشي من هنا
= نمشي ازاي ونسيب الشغل ماينفعش لازم نستنى ورديتنا تخلص
- هو احنا بنخلص الساعه كام صحيح نسيت اسأل
= احنا بنستلم ٨ بليل وبنسلم غيرنا ٨ الصبح
- طب الحمدلله هانت ، انت الساعه معاك كام دلوقتي
= الساعه ٣ ونص
- هي مش كانت من ٧ ساعات ٣ ازاي لسه ٣ ونص انت ساعتك بايظه ارميها
= انت خايف ياعثمان
- يادي عثمان وسنينه السوده ايوه ياسيدي خايف ارتحت كده ومرعوش من جوايا كمان
= ماتبقاش كروديا وانشف كده
- هي كروديا وصلت عندكم الصعيد ؟ ، انا واضح اني كنت مفضوح على مستوى المحافظات
= مفضوح على ايه ؟
- لا دي حكايه كده وراحت لحالها ، المهم دلوقتي قدم الساعه دي وخليها ٨
= وهو انا يعني لما اقدمها كده الورديه هتخلص
- اهو اي حاجه المهم تتصرف متبقاش زي اللوح كده
= ااااالحق ياعثمان ، القطه ظهرت وقربت مننا اهو
- بوز امك اخبر عليا كل مابتنادي اسمي بيبقى في مصيبة ، هشها من هنا ياعبده خليها تغور
= دي بتبصلك اوي شكلها ناويه ع الشر
- ابوس ايد اللي جابوا امك هشها ، هشها عشان انا خلاص قربت افقد الوعي والذاكرة
= ماهي مش عايزه تمشي
- اتصرف وحياة اهل الصعيد كلهم يكش كلكوا تحجوا يارب
= ااااااااالحق ياعثمان ..
- امك لأم عثمان في ساعة واحده انت ملبش جتتي اكتر من العفاريت
= دول بقوا ٣ قطط
- الحمدلله لسه ناقص اتنين ، وهنتفرم جماعي بعدها
= اااااااالحق ياعثمان ..
- انت يابغل انت قالولك هتشتغل هنا منادي على اسمي كفايه ياعبده قربت اقع من طولي ارحمني
= القطط مشيت
- طب ماده حلو ياحمار ، خايف ليه وموقف شعر راسي معاك
= كده هما راحوا ينادوه
- لا ان شاء الله مش هينادوا على حد واخرس انت شويه
= ااااااااالحق ياعثمااان ...
- اه يابن الكلب هتقطع خلفي ، انا في الليله دي مبقتش خايف الا منك انت
= انت بتخاف ياعثمان ؟
- انت فيك ايه ، ايه حكايتك معايا قولي ؟ دنا لو ام كلثوم مش هتحب تسمع مني كلمه خايف دي كل شويه
= هاهاهاها خوفتك انا صح ، عشان تحرم تعمل فيها سبع وتفرد نفسك
- يعني ايه خوفتني ؟
= هاهاها ده كان مقلب عشان ارعبك شويه
- دم امك يلطش بلد يااخي ابو ام الساعه اللي شوفتك فيها ياعبده الكلب
= خلاص روق ماتزعلش
- مازعلش ايه يابهيم هو مفيش غيري ناويين تقطعوا خلفه ونفسه من الدنيا
= هاهاهاها معلش بقى بضحك معاك فك كده
- حاضر ياخويا هفك داهيه فيك وفي همام وفى زهران وفي امي اللي خلفتني
بعدت عن عبد اللطيف وانا خلاص مش طايق حد ولا طايق حالي وهو كمان بعد عني وقولت الحمدلله ده عيل رخم شبه البومة ولحد ٧.٣٠ الصبح كنت خلاص بنام على روحي لحد ماجالي زهران افندى الوزير اللي ماطلعش وزير وبيطمن عليا ويشوفني مبسوط ولا لا جه وقالي
- ها ياعثمان مرتاح في الشغل هنا
= اهو كويس وزي القطران ، بس ممل يعني وساعاته مبتخلصش وربنا كمان ابتلاني بعيل رخم كرهني فيك وفي الشغل
- مين ده وعملك ايه ؟
= عبد اللطيف بتاع الصعيد ، دمه يلطش جمهورية وعمل فيا مقلب خلاني كنت هموت والله
- عبد اللطيف ؟! عبد اللطيف الله يرحمه انت شوفته فين ياعثمان ؟ ده مات مقتول من شهرين
= مين اللي مات ، ياجدع ده كان لسه واقف معايا من كام ساعه تقولي شهرين
- بقولك مات مقتول يابني ادم الله يرحمه
= عبد اللطيف الرخم مات ؟
- اه مات مقتول من شهرين
= يعني اللي كان واقف معايا ده عبد اللطيف المقتول
- ده اكيد العفريت بتاعه ..
= ده عفريت عفريت ولا مقلب برضو
- لا مفيش مقالب يمين بعظيم ده عفريته
= طب اتحتح كده شويه يازهران الكلب ..
.
.
- لا حول ولا قوة الا بالله مالك ياعثمان ايه جرالك ، حد يلحقنا بالاسعاف ياجماعة ..
(انتهت )
سلسلة عفاريت
الحكاية رقم (2)
#سلسلة_عفاريت
#عفاريت
#حكايات_عثمان
#ملك_القطط
#بيتر_ايفانجل
#Peter_evangl
#peter_nedved
