روايه الاميره والمغترب الفصل الاول بقلم الاء اسماعيل البشري
هذه الرواية متوفرة فقط على👇
لمتابعه روايه الاميره والمغترب كامله اضغط هنا 👇
بارت 1
- باركيلي يا ست الكل انا اتخرجت و بتفوق كمان !
- لولولولوووووووي ألف الف مبرووووووك يا ضناي عقبال الوظيفة إن شاء الله
- يا رب يا ماما ادعيلي بس اتوفق في الموضوع إياه
لوت فاطمة شفتها بتذمر : لسة برضو مصممة على رأيك يا بنتي ؟؟ بعني مفيش أي مجال انك تتراجعي عن فكرة السفر لكندا دي ؟؟!
- أيوة يا ماما انا رسمت طريق و مش هأغيره و شغل هنا مش هأدور
- مش عايزة تتوظفي هنا ليه طيب ؟ مالها بلدنا عشان تسيبيها و تتغربي عننا و في بلاد بعيدة زي دي !
اميرة : يا ماما انتي شايفة الشغل مقطع بعضه يعني؟! ما انتي عارفة اللي فيها .. كل حاجة بوسايط و مصالح و حتى لو فيه مدير شركة قبلني رغم اني من عيلة بسيطة و خبرتي على قدي ...أكيد هيقبلني عشان طمعان في حاجة تانية ..انا بقى عايزة أئب على وش الدنيا بتعبي و شقاي و من غير ما اخسر كرامتي و شرفي عايزة أطلعكم انتي و بابا و ندى من الفقر اللي احنا فيه ده و اعوضكم و لو شوية ...ما تفرد وشك يا جميل ..اهو بابا موافق و كل حاجة زي الفل قلقانة من ايه انتي مش فاهمة ؟؟؟
- مش عارفة يا بنتي ...قلبي مش مرتاح لحكاية سفرك عند خالتك ده.
احتضنتها بحب قائلة
- انتي بس ادعيلي و كله هيتدبر يا ماما يا عسل انتي
- يا رب يا بنتي ...على خيرة الله ...
أميرة بفرحة : ربنا يخليكي ليا يا فطومتي العسل انا هأكلم خالتي فاتن أوام عشان تحضر اوراق الإقامة و تبعثهالي على ما أجهز باسبوري و حاجتي .
خرجت أميرة بحماس و بقيت فاطمة تنظر في اثرها بقلق
- و الله ما أنا عارفة اقولك ايه يا بنتي ! أنا عارفة خالتك فاتن من لما كنا صغيرين غيرانة من كل حاجة تخصني .. مش عايزة اغصب عليكي أو أكسر حماسك و فرحتك بس اختي و عارفاها هي أكيد مش هتفتحلك ذراعاتها بحب زي ما انتي فاكرة ..يالا ربنا يهدي سرك و يرزقك من اوسع الأبواب يا ضنايا
بطلة قصتنا أميرة
بنت عمرها 24 سنة حلوة : بشرة بيضاء وعيون سوداء رموش كثيفة و حواجب سوداء متناسقة شعرها اسود مثل قطع من الليل و طويل متوسطة الطول قوامها جميل و انوثتها متكاملة ، ملامحها عربية بحتة و جذابة للغاية
عيلتهم مكونة من ابوها محسن مدرس عربي سابق و طالع عالمعاش ، امها و اختها الصغيرة ندى اللي اصغر منها بعشر سنين .
اتخرجت من الجامعة قسم محاسبة و زي أي بنت نفسها تحقق أحلامها بعد التخرج و اول حاجة فكرت فيها هي انها تسافر مقيمة عند خالتها اللي عايشة في كندا تقعد عندها ست اشهر لحد ما تلاقي وظيفة هناك .
للأسف مكانتش عارفة إن كل أحلامها هتتحول لكوابيس
محسن : حبيبتي يا أميرة انتي عارفة اني عمري ما عارضتك في حاجة و طول عمرك مستقلة برأيك و مش بأحب اتدخل في قراراتك بس انتي متأكدة من الخطوة دي ؟؟
- ربنا يسهلها يا بابا ما تقلقش عليا بنتك جدعة و بنت بلد ما بيتخافش عليها
- انا مش خايف غير من حكاية قعدتك عند خالتك دي
-حتى انت عدت ماما بمخاوفها !!
- غصب عني يا بنتي ..
- إتطمن أنا عاملة حسابي لكل حاجة ...هي 6 أشهر بالكثير و اكون لقيت شغل و عملت إقامة دايمة
- طب إفرضي مالقيتيش شغل في مهلة الإقامة المؤقتة اللي خالتك هتبعثهالك خلصت...هتعملي ايه ساعتها؟؟
- انت و ماما مكبرين الموضوع اوي على فكرة ...انا سبق و فهمتك ان الوظايف في كندا كثير اوي و هوما طالبين ناس عندها تخصصات معينة هندسة و محاسبة و كمبيوتر و انا الحمد لله عندي التخصص المطلوب يبقى ايه اللي يخليني أقعد من غير شغل ست اشهر ؟!
محسن بقلق : ربنا يسهلها يا بنتي .
حضرت أميرة كل اوراقها الخاصة بالسفر و فضلت مستنية الإقامة من عند خالتها و اللي جات بعد شهر ..دفعت اوراقها و معاهم الإقامة في السفارة الكندية و فضلت مستنية منهم خبر
عدت ثلاث اشهر و قربت تفقد الأمل لحد ما أخيرا لقت رسالة عالإيميل من السفارة
فتحته لقت أخيرا البشرى اللي كانت مستنياها
الفيزا بتاعتها جاهزة
طارت عند مامتها و الفرحة مش سايعاها و الدموع بتنهمر من عينيها تلقائي
- ماماااااا اخيراااا الفيزا وصلت ... ياااه اخيرا هألمس حلمي اخيرااا هتبدل حياتي ألف حمد و شكر ليك يا رب
- الحمد لله يا بنتي ربنا يسترها معاكي دنيا و آخرة و يرزقك من اوسع الأبواب يا رب ❤️
عدى اسبوع على اميرة ما بين تخليص باقي الاوراق و تجهيز حاجاتها للسفر لحد ما وصل اليوم الموعود
لبست بنطلون اسود و جاكت جلد مع هاف بوت اسود
حطت بيريه بيج مع شال من نفس اللون و فردت شعرها و طلعت المطار و معاها عيلتها اللي ودعتها و هي بتوعدهم انها مش هترجع مصر الا و هي أميرة تانية محققة كل أحلامها
طلعت الطيارة و قلبها بيدق جامد خايفة و دمعتها على خدها
بعد ما الطيارة اقلعت مسكت المصحف و فضلت تقرا و كل شوية تدعي ربنا يفتح في وشها بيبان الخير و يكرمها
عدت 13 ساعة مرة تتفرج على التلفزيون اللي قدامها مرة تنام مرة تقرا قرآن لحد ما صحيت على صوت المضيفة و هي بتعلن وصولهم للحدود الكندية
أول ما خلصت اجراءات المطار و طلعت لقت خالتها فاتن مستنياها هي و سحر بنتها سلمت عليهم و روحوا عالبيت يا دوب اتعشت و نامت على طول
ثاني يوم الصبح
نزلت أميرة لقت خالتها و بناتها حنان و سحر قاعدين بيفطروا
حنان أكبر من أميرة بسنة و مش بتطيقها خالص
و سحر أصغر من أميرة بثلاثة سنين و بتحب أميرة من و هوما صغيرين
أميرة بحب : صباح الخير
سحر بإبتسامة : صباح النور
تقدمت أميرة من حنان تسلم عليها
- ازيك يا حنان ما شفتكيش امبارح لما وصلت
سلمت حنان بثقل و هي ترد بصعوبة: الحمد لله
سحر : ان شاء الله تكوني ارتحتي من السفر يا ميرو ؟
أميرة بإبتسامة رقيقة: الحمد لله صحيت زي الفل نسيت كل التعب 😌
سحر : طب اتفضلي تفطري معانا انتي في بيتك ..
بصت لخالتها اللي كانت لاوية بوزها في الاول
فقالت فاتن بتصنع ما أن توجهت بنظرها نحوها
- ايوة طبعا البيت بيتك اتفضلي تفطري
جلست أميرة و من اول يوم شعرت بأنها غير مرحب بها من طرف خالتها و ابنتها الكبرى.
قالت لنفسها: معلش يا أميرة أكيد مش هتعيشي زي ما كنتي في بيتكم بس لازم تعصري على نفسك لمونة و تتحملي لحد ما تحققي اللي انتي جاية عشانه
خلصت فطارها و قامت
- طب أنا هألبس و اطلع اتعرف عالمدينة و اهو بالمرة اشوف نوع الشغل هنا ايه
سحر بدهشة : اوام هتبتدي تدوري على شغل! يا بنتي ده انتي لسة واصلة و ما ارتحتيش من السفر حتى!!
لكزتها فاتن بحركة لم تعتقد ان أميرة سوف تراها
- سيبيها براحتها يا سحر ...يمكن مش عايزة ترتاح لحد ما تتوفق و تلاقي وظيفة و تعتمد على نفسها ؟.
حمحمت أميرة بإحراج : خالتي معاها حق يا سحر انا مش عايزة أبقى ثقيلة على حد .. ولا عايزة أضيع وقت بالراحة
سحر : اللي تشوفيه ...طب انا هألبس و انزل معاكي
فاتن بحدة: يا سلام !! و مذاكرتك ؟؟ انتي ناسية انك ساقطة سنتين و اللي من سنك بقوم في سنة ثانية جامعة يا خايبة ؟؟
سحر في ثالثة ثانوي و ساقطة مرتين مرة بسبب مرض الالتهاب الرئوي اللي خلاها تقعد في المستشفى 3 شهور و هي ف اعدادي و السنة اللي فاتت في الثانوية العامة .
قالت أميرة لإزالة الاحراج عن سحر: و ايه المشكلة ما انا كمان سقطت سنة في الجامعة بس اتخرجت عادي اهو
- كل الناس بتسقط في الجامعة ..مش نفس الموضوع
سحر بتذمر : ليه بس يا ماما أميرة غريبة عن هنا و مش هتعرف تطلع لوحدها دي مدينتنا اكبر من المنصورة بعشر مرات!
- قلت لا يعني لا و يالا على مذاكرتك
سحر برجاء : هي مرة وحدة بس يا ماما و بعد كدة هتروح لوحدها ..ارجوكي !
فاتن بأمر : هتروح معاها حنان
بصت حنان إليها نظرة توعد بعدين بصت في ساعتها بتذمر : انا عندي معاد مع اصحابي عن اذنكم
طلعت بدون أن تنظر الى أميرة حتى .
أميرة بإحراج : خلاص يا خالتي مش مشكلة هأبقى اسأل و أكيد اللي يسأل ما يتوهش
سحر : تسألي مين انتي حتى ما بتعرفيش تتكلمي فرنساوي
فاتن بتفكير : طيب خلاص المرة دي بس و اوعي تتأخري !!! و الا هأخلي ابوكي يحرمك من المصروف .
سحر بفرحة : حاضر مش هنتأخر يالا يا ميرو عشان ما نتأخرش .
دخلت أميرة لتجهز نفسها و هي تتذكر كلام والدتها بخصوص اختها قائلة في نفسها : يعني خالتي من أولها ركبت الوش الخشب ده ربنا يستر بس و ألاقي وظيفة بسرعة عشان ما أضطرش اتحمل المعاملة دي كثير
غيرت هدومها و اخذتها سحر توريها المدينة
سحر معاها حق فعلا !! لو مكانتش طلعت معاها كانت تاهت بجد المدينة كانت زحمة اوي و شوارعها متلخبطة ما لهاش اول من آخر ...
أميرة: الحمد لله انك معاي و الا مكنتش هأعرف أرجع تاني
سحر: على فكرة يا أميرة ما تزعليش من ماما انت عارفة انها عصبية حبتين و بتبين قاسية لكن من جوة طيبة و بتحبك
أميرة بحزن حاولت تخفيه بإبتسامة اصطناعية : طبعا عارفة انتي هتعرفيني على خالتي .. انا معتبراها أمي الثانية هنا و مش هأزعل مهما عملت ...ده كفاية انها فتحت لي بيتها و وافقت تضيفني و الا مكنتش هأقدر أجي أصلا .
و همست بينها و بين نفسها : يالا نصيبي بقى شكلي مضطرة أعصر على نفسي بدل اللمونة شوال لمون و اصبر و اهي فترة و هتعدي .
يتبع بقلمي آلاء إسماعيل البشري
الأميرة و المغترب
