رواية زهرة أصلان كاملة جميع الفصول

رواية ما النهاية (كامله جميع الفصول) بقلم ميرال مراد

رواية ما النهاية الفصل الأول 

 انت جاي من بره من بدري... حطيتلك الأكل و مأكلتش و نمت... دلوقتي صحيت و نازل تاني !! 

رد عليا وهو بيرش البرفان

" اه نازل... ايه المشكلة ؟ 

' مفيش مشكلة بس يعني انت مفطرتش و الغدا متغدتش... ليه كده ؟ 

" اكلت في الشركة... حاجة تاني ؟ 

' طب انت نازل رايح فين دلوقتي ؟ 

ساب ازازة البرفان و بصلي بغضب 

" هتستفيدي ايه لما تعرفي ؟ 

' يعني انا مراتك و من حقي اعر.... 

اتعصب اكتر و زعق فيا 

" اوعي تنسي انك مراتي على الورق بس... و فوقي لنفسك و متسرحيش بكلامك و انتي بتقوليلي انك مراتي... و مش من حقك تعرفي انا رايح و لا جاي امتى و لا هقابل مين حتى... انتي ملكيش دعوة بحياتي و خليكي في حالك زي ما انا في حالي !! 

زعلت جدا من كلامه و حاولت احبس دموعي قدامه... اما هو رجع يبص في المراية و بيبلس الجاكت بتاعه... اتشجعت و قولت هرد عليه نفس الرد 

' طب لو انا لبست دلوقتي و خرجت من غير ما اقولك انا رايحة فين و هاجي امتى و هقابل مين... هترضى بكده ؟ 

ضر*ب ايده على المراية بقوة... لدرجة ان المراية اتكسر*ت و وقع الازاز كله على الأرض !!

" انا الراجل هنااااا... اخرج وقت ما انا عايز و اجي في الوقت اللي انا عايزه حتى لو على الفجر !! اما انتي يا رنا لازم اعرف و تقوليلي كل خطوة بتخطيها !! 

' ليه ان شاء الله ؟ مش بتقولي خليكي في حالك... انت برضو خليك في حالك... و زي ما انت بتخرج كتير انا كمان هخرج براحتي !! 

مسك ايدي بعصبية و قال 

" رنا... انا مش عايز اغلط معاكي ولا اوريكي وشي التاني اللي عمرك ما شوفتيه... اتكلمي عدل معايا و بطريقة احسن من كده... و مش هقعد اوضحلك و اشرحلك الفرق بين الراجل و الست لاني مصدع و على آخري... ف بلاش عناد على كل حاجة بعملها... و مش معني إني بقولك خليكي في حالك ييقى تعملي اللي نفسك فيه... تمام ؟؟؟ 

كان ماسك ايدي جامد... حاسة انه عايز يكسر*ها... دموعي نزلت قدامه و بصيت للارض و قولت بالعافية 

' تمام يا آسر 

بَعَد عني و اخد مفاتيح العربية و شطنته و خرج 

" بقولك يا نسمة 

* نعم يا استاذ آسر ؟ 

" انا اتعصبت على رنا شوية و عملت حاجة مش لطيفة معاها... لو سمحتي روحي اقعدي معاها و لمِي الازاز اللي في الأوضة 

* حاضر يا استاذ آسر 

خرج آسر من البيت و ركب عربيته و مشي 

كنت واقفة في نص الأوضة... مش مصدقة ولا قادرة استوعب اللي حصل ده... انا كل مرة بكتشف حاجة في آسر... كل مرة بيوضحلي اد ايه هو قا*سي و انا*ني و مبيحبش غير نفسه... ازاي هكمل معاه بقية عمري و انا مش قادرة استحمله حتى شهرين على بعض ! 

جات نسمة خبطت على الباب و دخلت... نسمة تبقى البنت اللي بتشتغل شُغل البيت عندي... لما اتجوزت آسر قولتله انا هتولى كل شغل البيت لوحدي بس هو موافقش... أصل بيثق فيها اكتر مني اساسا... ايوة هي بنت كويسة و اصلا تعتبر صحبتي من اول ما جيت عيشت هنا... بس في نفس الوقت مش بحب حد يعمل حاجة بدلا مني و آسر بكل حاجته مسؤوليتي انا... ربتت على كتفي بحنية و قالت 

* تعالي نعمل فشار و نتفرج على فيلم ؟ 

مسحت دموعي و قولت 

' لا مش عايزة... انا هنام 

جيت اخرج راحت مسكت ايدي و قعدتني على السرير و قالت 

* والله استاذ آسر واحد كويس بس عصبي سيكا... و طبيعي يحصل مشاكل ما بينكم انتوا لسه في اول الجواز... اي اتنين لسه متجوزين بيحصل ما بينهم كده... يعني بقولك متشيليش هَم ابدا...( غمزلتي ) انا متأكدة انك هتوقعيه في حبك... بس انتي محتاجة وقت مش اكتر... يعني مفيش حاجة بتيجي بسرعة... لازم شوية صبر صغننين و كل حاجة هتبقى كويسة 

ضحكت من طريقتها و قولت 

' خلاص خلاص مش زعلانة... بس هطلب منك طلب...ممكن ؟ 

* اه طبعا اتفضلي 

'.............. 

وقفت فضلت تفكر و بعد كده قالت 

* تمام موافقة !! 

فرحت جدا انها وافقت... قومت و حضنتها 

' بجد اشكرك اوي 

في الجانب الآخر.......... 

آسر كان في الجيم... بيرفع اثقال و بيتدرب تدريبه الاسبوعي 

كان بيرفع الحديد و متعصب اوي... جزء منه متعصب لانه متجوز وحدة مش عايزها...و الجزء التاني متعصب بسبب اللي عمله مع رنا و ضميره بيأنبه على كده 

ساب الحديد و قام... كان وشه مليان عرق من التدريب... طلع فوطة من شنطته و مسح بيها وشه و طلع ازازة مية يشرب 

* بصي الشاب اللي هناك ده ؟ 

- اه... ده جامد اوي

* ده واقف وحدة... انا هروح اكلمه 

صحبتها مسكت ايدها و قالت

- استني يا مجنونة... هتروحي تكلميه ازاي ؟ 

* يعني... ادلع شوية قدامه اعجبه و ياخد رقمي و نتكلم فيما بعد

- والله ؟ انتي مش شايفة شكله و ملامحه الحادة دي بتقول انه مش من العيال التوتو بتوع الزمالك... و مش هيجي بالطريقة السهلة دي 

* تصدقي عندك حق... بس الشاب جامد و قمور اوي و هو ده نوعي المفضل بالضبط... مستحيل اسيبه يعدي قدامي عادي كده... لا انا هروحله 

سابت ايد صحبتها و راحتله 

- لا بجد دي اتجننت رسمي ! 

آسر كان قاعد ماسك تليفونه و حاطط الهاند فري بيسمع اغاني... جات بنت لابسة لبس ضيق اوي... عملت نفسها كيوت و قالت بدلع

* لو سمحت... انا فوني ضايع هنا في الجيم و بدور عليه و مش لاقياه و صحبتي مش معاها رصيد تتصل عليه... ممكن فونك اتصل عليه بس ؟  

" و الجيم كله بالناس اللي فيه دي كلها مش معاهم رصيد برضو ؟ 

* سألت كذا واحد قالي مش معاه 

بصلها آسر ببرود و سمحلها انها تاخد تليفونه تتصل عليه... و اتصلت على تليفونها... سمعت رنته و قالت

* اهو بيرن هناك... بجد Thank you very much... انت طيوب اوي على فكرة 

" العفو 

* أنت اسمك ايه ؟  

حط آسر الهاند فري على ودانه تاني و اداها ضهرها و مردش و اتجاهلها 

مشيت و قالت بخبث

* يلا مش مهم... كده كده رقمك وصل عندي !! 

- عملتي ايه ؟ 

* اتكلمت معاه و اخدت رقمه كمان 

- يا مجنونة... ازاي عملتي كده من اول مرة ؟ 

* ليا طُرقي الخاصة 

- طب وريني رقمه عشان اصدق بجد 

طلعت البنت تليفونها و راحت على المكالمات و سجلت رقمه 

- اديله رنه كده 

* عنيا 

رنت عليه البنت بس التليفون بيديها مشغول في الحال مع انها شيفاه مش ماسكه اصلا... اتعصبت و رمت التليفون على الارض 

- ايه مالك فيه ايه ؟ 

* عملي بلوك !!! 

صحبتها فضلت تضحك عليها... اما آسر غَيَر لبس الجيم و مشي راح عند صديقه و هم الاتنين طلعوا على المطعم ياكلوا سوا

الساعة 2 بالليل......... 

* الرقم الذي تطلبه غير متاح حاليا الرجاء الاتصال في وقتٍ لاحق *

رميت التليفون على السرير و قولت 

' اووووف... طب ده قافل تليفونه ليه... الساعة جات 2 الليل و الاستاذ لسه مجاش !!  

قعدت على السرير و قولت بزعل 

' كذا مرة يكرر الحوار ده... و يجي بعد الفجر ينام و يصحى الضهر يروح شركته و يرجع يا ينام او يخرج زي كده هو ده يومه... المهم يعمل اي حاجة عشان ميقعدش ساعتين على بعض معايا... مهما اشتكيتله و قولتله اني بضايق من كده لكن لاااا ازاي يسمع كلامي !! 

' الوقت اتأخر جامد... انا جهزتله العشا... و جهزت كمان على اللاب توب فيلم تركي اكشن من اللي بيحبه... قولت حتى احاول اصاحبه بس مش اكتر... لكن هو مجاش !! 

حطيت ايدي على وشي و قولت 

' ليكون متجوز عليا و كل الوقت ده معاها هي... بس ليه يتجوز... انا مبعدتهوش عني هو اللي بيبعد مش انا !!

قومت بصيت على نفسي في المراية... شوفت شلال الدموع اللي بينزل من عيوني 

' طب هل انا فيا حاجة غلط عشان كده مش بيحبني ؟ انا عملت ايه لدرجة انه مش طايق يقعد في بيته بسبب اني موجودة فيه !! 

' الساعة جات 3 الفجر... شكله مش جاي و هيبات بره زي ما عمل كده كذا مرة... مهما قولت برضو مفيش فايدة !! 

دخلت الحمام و غسلت وشي و لسبت بيجامة النوم و رجعت للاوضة 

كنت بطلع البطانية و بفردها على السرير... سمعت صوت باب الشقة اتفتح و اتقفل تاني... ف عرفت انه جه 

دخل الأوضة حتى مبصليش ولا اتكلم ولا برر ليه اتأخر كده... رمي مفاتيحه على الترابيزة و انا عملت نفسي بساوي السرير 

" بصي لوراء عشان هغير هدومي 

' ليه خايف اتحر*ش بيك ولا ايه ؟ هو انت مفكر إني همو*ت عليك لسمح الله ؟ 

" يووووه... بقولك ايه... تعرفي تختصريني خااالص و متحتكيش بيا نهائي ؟ 

' كل ده و مش مختصراك ؟ 

" ايوة... بتدخلي في اللي ملكيش فيه... كلمتك زي البني آدمين و قولتلك يا تبصي لوراء او تخرجي... اما انتي عايزة تتخانقي معايا على اخر الليل من غير سبب و انا مش فايق ليكي و عايز اتخمد 

قربت منه و قولت 

' كنت فين يا آسر كل ده ؟ 

" و انتي مالك !! 

هزيت رأسي ب تمام و قولت 

' انا هقول ل ابوك على كل اللي بتعمله معايا ده... هقوله انه ابنه 20 ساعة بيقعد بره و ال 4 ساعات الباقي بيجي ينامهم و معرفش بيروح فين ولا بيقابل مين حتى 

رد بمنتهى البرود 

" قوليله... وهو هيعرف السبب من نفسه 

' آسر... هو انت متجوز عليا ؟ 

ضحك بسخرية و قال 

" والله يا رنا... انا طايقك بالعافية اساسا... و كر*هت فكرة الجواز من اول ما اتجوزتك... ف بصراحة استني اطيقك انتي الأول و بعد كده ابقى اطيق التانية 

' آسر انا مش عارفة ليه بتعاملني كده و...... 

" بعاملك كده من اسلوبك ده... اتكلمي معايا عِدل زي ما بكلمك بالذوق و الأدب و مش هتلاقيني برد عليكي كده... و بطلي جو المخبرة اللي بتعمليه معايا و عايزة تعرفي كل خطواتي... انتي في اي فرصة عايزة تتخانقي معايا بدون سبب و هو ده اللي بيخليني اقعد بره لحد دلوقتي !!

' بترمي عليا الذنب انا دلوقتي ؟ 

" مش هرد عليكي عشان مش هفتحلك مجال للخناق تاني... انا بالي طويل معاكي و مستحملك اهو... اظن انك لو متجوزة حد تاني كان زمانه طلقك و ارتاح !! 

كلامه نزل عليا زي السك*ينة غرزت في قلبي... اديته ضهري و نمت على السرير غطيت نفسي و فضلت اعيط تحت البطانية... و هو غَيَر هدومه و نام على الكنبة عادي جدا... 

على 5 الصبح كده صحيت عشان اشرب... و لما رجعت الأوضة لقيت آسر جسمه بيرتعش و بيتمتم بكلامات مش مفهومة... قربت منه... حطيت ايدي على جبينه لقيت حرارته عالية اوي... قومته و سندته عليا و نيمته على السرير وهو تقريبا مش واعي و جريت جبت دواء خافض للحرارة ادتهوله و كمان عملتله كمادات... قعدت ساعة جمبه و لما حرارته نزلت شوية ارتحت و اخدتني نومة 

على الساعة 10 الصبح آسر صحي لقي نفسه على السرير... استغرب اوي لانه فاكر كويس انه نام على الكنبة... لقي قماشة فوق راسه... و استغرب اكتر لما لقي رنا نايمة جمبه و ساندة راسها على كتفه و ماسكة ايده...

" هو حصل ايه امبارح ؟ 

مرضيش يقوم ولا يتحرك عشان رنا متصحاش و فضل جمبها... اول مرة تبقى قريبة منه بالشكل ده... فضل يتأملها و يبص عليها و جواه أسئلة كتير : 

" معقولة بعد اللي قولته ليها امبارح و بعد كل اللي حصل ده ساعدتني و فضلت جمبي لما تعبت ؟ 

" طب ليه عملت كده... يعني اكيد هي زعلت بعد اللي قولتله ده... ساعدتني بعدها عادي كده ؟ 

" شوية سخونة نزلت عليا في الليل و قامت ساعدتني بدون ما تفكر هل انا استاهل المساعدة دي ولا لا ... 

" انا طلعت وحش اوي... وحش لدرجة إني ضايقت وحدة قلبها ابيض زيها ... 

قام آسر بالراحة و غطاها كويس و سابها تكمل نومها... دخل اخد دُش 🚿... و لما خرج لقي رنا صحيت 

بمجرد ما شوفته قدامي جريت عليه... و بقيت بحط ايدي على جبينه و خده 

' الحمد لله... حرارتك نزلت و بقت طبيعية 

بَص آسر بإستغراب على ايدي اللي على خده... سحبتها و بعدت عنه 

' انا آسفة... بس كنت بشوف بقيت كويس ولا لا... اصل على الليل كده حرارتك ارتفعت جدا 

" لما صحيت لقيتك نايمة جمبي و كمان كنتي ماسكة ايدي  

وشي اتقلب كله احمر و بصيت للارض 

' مأخدتش بالي صدقني... محستش بنفسي خالص و نمت... انا آسفة 

" تمام ولا يهمك

فتح الدولاب و طلع هدومه عشان يروح الشركة... كنت هخرج عشان يغير و بالمرة اغسل وشي... لكن وقفني لما مسك ايدي و قال 

" استني يا رنا 

' نعم ؟

" انا هلبس عشان رايح الشركة 

' تمام 

" و بعد ما اخلص شغلي هاجي البيت و بعدها هخرج تاني

' تمام 

" معندكيش فضول تعرفي انا رايح فين بعد ما اخلص شغلي ؟  

' لا... اخرج براحتك

سيبته و دخلت الحمام... آسر وقف مكانه مستغرب من اجابتها... لبس هدومه عشان ميتأخرش 

" هي فين نسمة مجتش ليه النهاردة ؟ 

' امها تعبانة شوية و راحت عندها و استأذنت مني 

" اه تمام 

اخد حاجته و مشي... حتى مقالش افطر ولا لا... بس انا عملت حسابي و حطيتله لانش بوكس في شنطته... فيه كل انواع السندويتشات اللي بيحبها... بس يارب ياكلهم بس 

كنت قاعدة بتفرج على مسلسلي المفضل بعد ما خلصت شغل البيت كله لوحدي... كنت مندمجة مع المسلسل اوي و بشرب سحلب... فجأة شوفت التليفون بيرن... كان رقم مش متسجل عندي... مردتش بس فضل يرن كتير... رديت عليه 

' الو ؟ 

* يا مدام رنا... تعالي الشركة بسرعة... آسر اغمى عليه و بنفوقه لكن مفيش اي استجابة... ارجوكي تعالي بسرعة 

' انت بتقول ايه !! 

يتبع .......... 

         رابط البارت الثاني     

تعديل المقال