القائمة الرئيسية

الصفحات

أحدث المواضيع

رواية مجدي صفيحة والعشرين حرامي الفصل الثالث " امسك حرامي "



 رواية مجدى صفيحه والعشرين حرامى

للكاتبه/لينا بسيوني
الفصل الثالث بعنوان"إمسك حرامى"
أتصرفنا فى الحاجة وطلعلنا في المصلحة دى حوالى ٧٥٠ الف جنيه. .
دا بعد ما الراجل النصاب الضلالى اللي اشترا مننا الحاجة خسف بتمنها الأرض ،
الحاجة كانت تعدى ال ٢ مليون!!!
أديت لابويا نصيبه وعرقه فى الشغلانه... 50 الف جنيه
سبلى وشتمنى بصوت العالى قدام الناس فى الشارع !! فأديتله 20 الف تانيين علشان أسكته.
.
أشتريت كام جهاز بلاستيشن للعيال،على كام مرجيحه وزحليقه حطتهم فى الجنينه للعيال علشان يلعبوا وينبسطوا ,
وكانوا مبسوطين جدا وجريوا حضنونى انا وأبويا مع ان أبويا مجابش حاجه !!
وفى يوم صحيت على صوت العيال وهى بتعيط وتصوت !! طلعت فوق وانا ملهوف ، واتصدمت لما لقيت حمادة مغمى عليه على الأرض!!
جريت عليه وانا بسأل العيال على اللى حصله
قالولى أن الاغماءه دى بتجيله ومن وهو فى الملجأ !!
.
شيلته وجريت بيه علي المستشفى ، وهناك الدكاترة عملوا أشعة علي المخ وفجأونى أنه محتاج عمليه تكليفتها ممكن تعدى المليون جنيه !!! وبتتعمل فى مستشفيات معينة!!
جريت على البيت وجبت الفلوس الباقيه من عملية العفش .
الفلوس كانت تقريبا نص مليون جنيه بس!!
ضربت شهادة ميلاد لحمادة وحجزتله المستشفى ودفعت عربون العمليه .
أضطريت أعمل عملية نصب تانيه علشان أغطى باقى مصاريف العمليه.
قعدت على الفيس بوك وفضلت أتصفح الاعلانات اللى عليه ,
كلاب للبيع , هدوم وجزم , عربيات , ساعات , رحلات حج وعمره

.. لا .. لا .. حج وعمره حرام ننصب على الناس وهيا رايحه تحج ..
رحلات شرم والغردقه !!
هو ده ...
لفيت على أعلانات شركات السياحه اللى على الفيس بوك واللى بتبيع رحلات لشرم والغردقه والمناطق السياحيه .
سعر الاقامه فى ال3 ليالى فى المتوسط الفين جنيه للفرد الواحد
الموسم ده موسم عيد وأغلبية االناس بيسافروا فى أجازة العيد
بدأت أخطط للعمليه .. وعلشان أخطط لازم يبقى عندى معلومات عن الفنادق وشركات السياحه علشان أعرف شغالين أزاى
أيه اللى بيحصل لما تحجز مع شركة سياحه !؟


شركة السياحه بتاخد تفاصيلك ,أسمك وعدد الافراد اللى معاك وتسجلهم عندها وبتحددلك معاد للدفع وتقريبا بيكون حد أقصى أسبوع قبل معاد الرحله
بعد كده الشركه بتبعت الحجز بتاعك للفندق اللى أنت أختارته
الفندق بياخد تفاصيلك من الشركه وينزلها على السيستم عنده ويحدد معاد دفع للشركه علشان تفعل الحجز وتقريبا بيبقى من 5 أيام ل3 أيام قبل معاد الوصول .
فيه بقى شركات سياحه بتبقى كريدت (ليها رصيد عند الفندق)..
بمعنى أنها أصلا شاريه الاوض دى من الفندق ودفعت سعرها مسبقا ... فبالتالى الفندق مبيحددلهاش معاد دفع لانه واخد فلوس الاوض قبل ماتسكن
الفندق بينزل التفاصيل ويفعل الحجز على طول
اللعب بقى على الشركات الكريدت واللى ليها كوم متمنت (لفظ فى مجال السياحه بمعنى ألتزام من الفندق )
دورت على الفيس على أفضل عروض لرحلات الغردقه وشرم الشيخ ولقيت شركات كتير منزله عروض .
أخترت الشركات اللى صفحاتها عليها مشتركين كتير .
دخلت كأنى زبون مخضرم وبسافر كل سنه وسألتهم أذا كانوا شغالين مع
الفندق كريدت ولاكاش؟ ..
المعلومه عادى أنه يقولهالك , بالعكس الشركات اللى شغاله كريدت ممكن يفخر بده
علشان يعتبر من ضمن جودة الخدمه .. مش هتوقف فى الرسيبشن على مايراجعوا دفع الاوضه ..هيسكنوك على طول
اخترت الشركه اللى هتبقى زبونى ، ودخلت كلمتهم على الفيس بوك وقولتلهم أنى رئيس نقابه مهنيه وعندى حوالى 100 واحد عايزين يحجزوا فى العيد .
طبعا فرحوا جدا وقدمولى عرض كمان على كل 15 واحد فيه زبون مجانا
قولتلهم أنى هرجعلهم بقائمه بأسامى الناس وأسامى الفنادق
وخدت عروض العيد اللى على صفحتهم , وعملت صفحه على الفيس بوك وسميتها بنفس أسم الشركه بس لغبطت الاسامى
يعنى مثلا بدل من "شركه سكاى أنترناشونال ترافيل للسياحه "..
خليتها " أنترناشونال ترافيل سكاى للسياحه "
علشان مابقاش سرقت أسم الشركه وفى نفس الوقت سرقته!!
هقولك ليه أصبر !!
عملت أعلان مدفوع
ونزلت العروض بتاعتهم بس بنص الثمن !!!
وأستهدفت الناس الراقيه برده
الناس بدات تحجز معايا على عروض العيد ،ومكنتش ملاحق ..
طبعا علشان الاسعار اللى منزلها بنص التمن .


فيه ناس كانت ناصحه وعايزه تدفع فى مقر الشركه ودول فكتنى منهم .
لميت أكتر من 100 أسم ودول أختاروا طريقة الدفع عن طريق التحويل البنكى علشان مقر الشركه بعيد عنهم .
حددتلهم معاد دفع لحساب كنت عامله فى البنك
معاد الدفع كان قبل الوصول للفندق بأسبوع .
وبعت القائمه بالاسماء لشركة السياحه وحددولى معاد دفع برده قبلها بأسبوع ..
قولتل للشركه أنى هاجى أدفع مبلغ بكره 10 تلاف جنيه كعربون لاثبات حسن النيه و لتأكيد الحجز .. بس باقى الفلوس هدفعها قبل الوصول ب4 أيام ..طبعا وافقوا ورحبوا جدا .
الناس اللى حجزت معايا قبل مايحولوا الفلوس لحسابى اتصلوا بالفندق والفندق أكدلهم أن الاوض بتاعتهم موجوده على السيستم وتبع شركة سكاى
خدت بالك انت شركة سكاى .. محدش هيتأكد من أسم الشركه كامل .. أو هيتأكد من أنه مكتوب صح .. هيختصر ويسألى بس على شركة سكاى !!!
التحويلات تمت الحمد لله فى الحساب وسحبتهم وقفلت الحساب
هتقولى طيب ماهم ممكن يوصلولك من بيانات بطاقتك اللى عملت بيها الحساب فى البنك هقولك انى معايا بطايق كتير أوى
أى محفظه نشلتها خدت منها بطاقة صاحبها ،وفلترت البطايق كلها

وأخترت الناس اللى شبهى شويه .. كده كده محدش بيبقى شبه نفسه فى البطاقه ومحدش أصلا بيركز فى صورة البطاقه
ولو حتى كنت عملت الحساب ببطاقتى و وصلولى بعد ماقفلت الحساب
انا مسرقتهمش دول ناس حولولى فلوس على حسابى
ومفيش دليل واحد عليا لان ببساطه محدش شافنى ..
والقانون لايحمى المغفلين
حتى الصفحه اللى على الفيس مش موجوده علشان أتحذفت بعد التحويل
و لما بعمل الصفحات دى بعملها من سايبر نت تحت السلم..
ومبروحش نفس السايبر مرتين .
لميت من الحكايه دى مبلغ كويس وأنا قاعد فى البيت
كملت بيهم مصاريف عملية حماده
والحمد لله ربنا عداها على خير والعملية نجحت وخدتله أوضه واسعه فى المستشفى الخاصه
وقبل مايخرج من المستشفى بيوم .
أتلمينا كلنا فى الاوضه انا وأبويا والعيال الصغيره وجيبناله تورته كبيره وعملناله حفله صغيره بمناسبة عيد ميلاده اللى صادف خروجه من المستشفى ..
حماده كان بيبصلى و هو فرحان أوى .. وأتفاجأت بيه
بيحضنى جامد وبييبكى !!
وقالى :
أنا بحبك أوى يابابا مجدى !!
عينى غرغرت وحضنته
مسحت عينى وقولتهم :
وأنا كمان بحبكم كلكم والله أعلم أنا حبيتكم أد أيه بعد ماعشت معاكم , وعهد عليا ماحرمكمش من حاجه أبدا طول مانا عايش ..


قربوا عليا كلهم وخدونى بالحضن وفضلوا يبوسوا فيا .
أبويا كان متاثر جدا بالمشهد وطلع سيجاره وولعها فى الاوضه !!
قالى وهو متأثر :
وبالنسبه لأبوك يابن الكلب ....مش هتشوفه أذا كان عايز حاجه هو كمان
ولاتقولهما أف .. ياله !!
قولتله :
يابا ما أنت لاهف 70 الف جنيه من العمليه اللى فاتت .
خد نفس من السيجاره وقالى :
مانا دفعت منهم مصاريف للعيال وانت مع حماده فى المستشفى !!
وبص للعيال وهو بيغمزلهم وقالهم :
صح ياعيال !!! ... اهم قالولك صح أهوه .. يابنى أنا صرفت يجى 60 الف جنيه شيبسى وحاجات حلوه طول الفتره اللى كنت فيها مع حماده فى المستشفى !!
قولتله :
عادى يابا أعتبرهم زكاه عن صحتك وعفيتك .. وبعدين نبقى نتحاسب لوحدنا مش قدام العيال
وأطفى السيجاره اللى فى أيدك , علشان أنذار الحريق شغال بقاله 5 دقايق !!
أدارة المستشفى جم ومشونا علشان التجمع اللى كان فى الاوضه

والسجاير اللى ولعها أبويا .
حماده رجع معانا البيت وحالته بدأت تتحس أكتر مع الوقت
الفلوس قربت تخلص فعلمت عمليه تانيه صغيره
نفس الفكره روحت لسايبر تحت السلم وعملت صفحه لبيع الكريمات والميك اب المستورده وبخصومات تصل ل50 % وحددتها للناس اللى مهتمه بالحاجات دى .
طبعا الحاجات دى الناس مش بتثق تشتريها من على النت أصلا
بس مع مجدى صفيحه هتلاقى نفسك بتشترى غصب عنك
قتقولى :
أزاى !!؟
هقولك :
زى السكر فى الشاى !!!!
بص ياسيدى فيه حاجه فى علم النفس أسمها سيكولوجية الحشد هبسطهالك
لو أنت رايح تشترى خضار من السوق ولقيت الناس ملمومه على بياع معين وعاملين عليه زحمه ,هتلاقى نفسك لا اراديا بتروح تشترى منه هو دون عن كل البياعين اللى فى السوق
مع أنه ممكن مايكونش عنده أحسن حاجه فى السوق !!
عارف ليه !!؟
علشان لقيت عليه زحمه كتير فوثقت فى رأى الناس اللى بتشترى من عنده .. مشيت مع الحشد .
ده بالظبط اللى هعمله


عملت الصفحه و وقولت للعيال اللى فى السايبر :
ياجدعان
اللى هيعمل كومنت على البوست ده ويقول أنه أشترى المنتج وأنه خرافى وعالى الجوده هديله 20 جنيه
لقيت السايبر كله اتلم عليا وكل واحد دخل كتب كومنت من بروفايله
منهم اللى كتب :
المنتج تحفه ورخيص جدا ومع انى أصلع بس المنتج طلعلى شعر فى أسبوع واحد بس
ومنهم اللى كتب :
أختى جربت المنتج وبتقولكم ربنا يباركلكم وبتسأل على عروض ماركة ماك للميكب .
وهكذا ...
اتفاجات بواحد رافع ميكرفون صغير وبينادى على الناس اللى فى الحاره وبيقول :
ياجماعه اللى عنده أكونت على الفيس بوك ينزل السايبر حالا وهياخد 20 جنيه !!!
فوجئت بكمية ناس واقفين طوابير على السايبر !!!
خرجت من السايبر بالعافيه بعد مالميت حوالى 50 كومنت كلهم بيشكروا فى المنتج وبينقلوا تجربتهم .
الناس طبعا بعد التعليقات المشجعه أشتروا من عندى زى بالظبط مابيشتروا من بياع الخضار اللى عليه زحمه .
معاد التسليم خليته فى يوم واحد وأتفقت مع أكتر من شركة شحن والحمد لله جبرت
بعت ادوات التجميل المغشوشه بس المكسب كله على بعضه كان 100الف جنيه بس .
ومصاريف العيال كتيره أوى فقررت أعمل عملية عفش تانيه زى اللى كنت عاملها قبل كده..


عملت كل حاجه الصفحه والاعلان وأخترت زبونى وخدت أبويا معايا بالعربيه , وخلعنا بالعفش زى المرة اللى فاتت ,
الحاجه المره دى كانت كلها تحف و أجهزه تعدى ال4 مليون !!!
.
وقررت أصرف الحاجه صح المره دى علشان ولاد الحرام مايخسفوش بتمنها الارض
أجرت شقه فى مكان محترم لمدة شهر ونقلت العفش كله فيها ..
لبست بدله شيك وروحت لمحل نضيف بيبع وببيشترى تحف والاجهزه الكهربائيه الغاليه
وقابلت صاحب المحل وعملت نفسى رجل أعمال وقولتله أنى بصفى شغلى فى مصر وعايز ابيع عفش بيتى لظروف طارئه.. وعرفته أن العفش هاى كلاس .
جه معايا الشقه اللى مأجرها وبص على العفش وتمم عليه وحتى سألنى على التلفزيون جبته منين ؟!!
علشان كان تقنيه عاليه جدا وصناعه سويديه ...
قولتله أنى على طول بسافر وبنقى الحاجات اللى بتعجبنى مهما كان تمنها .
عرض عليا 2 مليون فى الحاجه كلها
رفضت طبعا واًصريت على 4 مليون .. ووصلنا لحل مشترك وهو 3 مليون جنيه !!
فرحت جدا ، مش كده بس ده كلم المحل فى التليفون وقالهم يجيبوا الفلوس والعربيات علشان ينقلوا الحاجه على طول !!!
كان خايف أرجع فى كلامى
فضل قاعد معايا فى الشقه مستنيهم يجوا .. عملته فنجان أسبريسو من مكنة الاسبريسو بتاعتى الخاصه اللى فى العفش
وبالفعل ساعه بالضبط ولقينا باب الشقه بيخبط
فتحت الباب وفوجأت بصاحب الحاجه الحقيقى واقف على الباب وجمبه البوليس !!!

***********************


***********************

تعليقات